काठमाण्डु – १४ नोभेम्बर २०२२ को मिति विश्व राजनीतिको लागि ऐतिहासिक दिन भएको छ। दुई देशको झण्डाको पृष्ठभूमिमा अमेरिका र चीनका राष्ट्र प्रमुखले हात मिलाउँदा इन्डोनेसियाको बाली सहर यसको साक्षी बन्यो ।
मुलिया होटलमा भएको यो भेटमा सारा विश्वको नजर टिकेको थियो । अमेरिकी राष्ट्रपति जो बाइडेन र चिनियाँ राष्ट्रपति सी जिनपिङको धेरै वर्षपछि भेट भएकोले पनि यसको महत्व छ ।
पछिल्ला केही वर्षमा अमेरिका र चीनबीचको सम्बन्ध राम्रो छैन । कहिले ताइवानलाई लिएर अमेरिकाले चीनलाई निशाना बनाउँदै आएको छ भने चीनले अमेरिकाको आन्तरिक मामिलामा हस्तक्षेप गरिरहेको बताउँदै आएको छ ।
खैर, सम्बन्ध सुधार गर्ने प्रयासमा जिनपिङ र बाइडेन एकअर्कासँग कुरा गरेका छन् ।
सीले भने,‘तपाईलाई भेट्न पाउँदा खुसी लाग्यो राष्ट्रपति महोदय । अन्तिम पटक हामीले पाँच वर्षअघि डाभोसमा भेटेका थियौं। तपाईं (अमेरिकी) राष्ट्रपति बनेपछि हामी अनलाइन कलमार्फत सम्पर्कमा रह्यौं। तर, आमने-सामने भेटहरू फरक छन्। र आज तिमी र मेरो भेट भइसकेको छ।’ सीले भने ।
‘हाम्रो अनुभव बढेको छ, तर हामीले धेरै पाठहरू पनि सिकेका छौं। इतिहास सिक्नको लागि सबैभन्दा राम्रो किताब हो र हामीले इतिहासलाई ऐनाको रूपमा लिनुपर्छ। हामीले अहिले चीन-अमेरिका सम्बन्धको मोडमा धेरै ध्यान दिएका छौं। दुई ठूला देशका नेताको हैसियतमा हामीले सही बाटो रोज्नुपर्छ । द्विपक्षीय सम्बन्धलाई सुदृढ र अगाडि बढाउन सही दिशा खोज्नुपर्छ ।’
सी जिनपिङले विश्वको नजर चीन र अमेरिकामा रहेको बताए । उनले भने, ‘संसारले अमेरिका र चीनले आफ्नो सम्बन्धलाई राम्ररी सम्हाल्न खोजेको छ। मानिसहरु हाम्रो बैठकलाई हेरिरहेका छन्। हामीले विश्वमा शान्ति स्थापना गर्न अन्य सबै देशहरूसँग मिलेर काम गर्न आवश्यक छ।’
अमेरिकी राष्ट्रपतिले दुई देशबीचको टकरावबाट जोगिनु पर्नेमा जोड दिएका छन् । उनले आमनेसामने भेट्ने कुरा फरक भएको र त्यसको विकल्प नभएको बताए ।
उनले भने, ‘दुईबीचको वार्ता जारी रहनुपर्छ र म त्यसमा प्रतिबद्ध छु। जलवायु परिवर्तन वा सुरक्षाका विषयमा तत्काल र एकैसाथ विश्वव्यापी मुद्दाहरूमा छलफल गर्न आवश्यक छ।’ दुवै देशले साझेदारीको रूपमा काम गरोस् भन्ने विश्वले पनि चाहेको बाइडेनको भनाई छ।
तपाईको प्रतिक्रिया दिनुहोस